مشترياتي لشهر نوفمبر من (سنتربوينت- أونلاين-دايسو)❤️

السلام عليكم ورحمة الله وبركاته ،،، 

حبيت هالشهر اكتب بوست عن مشترياتي في هالفتره وكانت أكثرها من الميكب والعناية بالبشرة بما اني في فترة حمل وبشرتي تحتاج عنايه اكثر بسبب التغير في الهرمونات وظهور حبوب في بشره الوجه وأثار التعب من لوحام 💔

المهم راح ابداء بمجموعة العنايه بالوجه .

أولاً : جهاز كلاراسونيك ميا لونه بنك اخذته أونلاين لتنظيف الوجه شفت عليه مدح وايد واتوقع كل العالم عندها الا أنا ...:) وبعد قريت انه ينظف البشره بشكل جميل وعميق أقوى عشر مرات من التنظيف العادي فقررت اخذه بسبب الحبوب يلي ظهرت لي . 

مرفقات الجهاز كانت عباره عن ميني غسول للوجه يناسب جميع انواع البشره و شاحن وفرشتين وبوكس لحماية الجهاز .

ثانياً: ماسك الفحم من دايسو للتخلص من الروؤس السوداء كتجربه أولى حبيته حسّيت انه فعلا قوي وينظف من قلب . 

ثالثاً: غسول الفحم من دايسو استخدمه بعد الماسك 

رابعاً: استكرات الانف اتوقع بالفحم للتخلص من الروؤس السوداء بعد من دايسو 

خامساً: صابونة توني مولي الكوريه للمسامات هي عباره عن صابونتين على شكل بيض البيضاء للصبح والبنيه للمساء اخذتها أونلاين . 

 

والحين راح اوريكم مشترياتي من المكياج ❤️

أولاً: باليت من توفيسد اسمه شوكلت بار أخذته أونلاين اتوقع الكل يعرفه وألوانه روووعه 

ثانياً: باليت من أُربن ديكاي نيكد 2 أخذته اونلاين وبعد اتوقع الكل يعرفه من قبل كان عندي نيكد 3 والحين 2 عقبال اكمل المجموعه :) 

ثالثاً : باليت من ذا بالم أخذته الشهر الماضي بس حبيت أضيفه في بوست هالشهر اسمه ميت مات اي نيود بعد اتوقع الكل يعرفه وألوانه تجنن اخذته أونلاين.  

رابعاً: لوس باودر من بن ناي اسمها بنانا بودر تستخدم كمثبت للكونسيلر وتعطي نهايه حلوه للميكب حبيتها وايد اخذتها أونلاين.  

خامساً: فرش ريل تكنيك مجموعة الوجه ومجموعة العين وبعد إسفنجة ريل تكنيك البديل الأرخص للبيوتي بلندر أخذتهم أونلاين للان أسعارهم اونلاين ارخص بوايد من السوق او من سنتربوينت 

سادساً: جل لينر من لوريال احبه للان سواده قوي وما يروح بسرعه ويعطي شكل مات وايد حلو. 

سابعاً: فاونديشن أير مات من بورجوا اخذته من سنتربوينت يناسب البشره الدهنية يعطي احساس مخملي وماله داعي تثبيته باي باودر للانه يقلب مات على باودر ...... مدري كيف أُوصِّف النهايه حقه

ثامناً: أرواج مات من بورجوا تركيبته وايد حلوه تعطي احساس مخملي في البدايه وبعدها يقلب على مات رووووعه 

تاسعاً: برايمر من بورجوا اخذته بعد من سنتربوينت يغطي المسامات ويناسب البشره الدهنية بعد روووعه 

عاشراً: ماسكارا ذي آر ريل من بنفت اخذتها أونلاين روووعه احلى مسكره استخدمتها بس مشكلتها ما تروح بسرعه من العين وتنظيفها متعب بس جد تغنيج عن تركيب الرموش ❤️

وأخيراً : مزيل مكياج الوجه والعين وفي نفس الوقت تونر اخذته من سنتربوينت بس للحين ما جربته  

وهذا كل شي اتمنى يعجبكم البوست وهذا اول بوست اتكلم فيه عن مشترياتي ❤️❤️❤️

حسابي الانستغرام : zezisbeauty 

تهيئة البشره للمكياج والعناية الروتينية ❤️

السلام عليكم ورحمة الله وبركاته ،،،،

راح اكتب اليوم عن العنايه بالبشرة قبل المكياج وتهيئة البشره وتعتبر عنايه اسبوعيه للحفاظ على نظارة وجمال البشره بما انه بشرة الوجه تعتبر بشره حساسه وتتأثر دايما بعوامل الجو او حتى الاهمال 💌

( التنظيف )

1-استخدمي مزيل مكياج العيون لإزالة أي شيء على عينك واستخدمية للشفايف لإزالة الروج وبعد كذا استخدمي مزيل المكياج لباقي الوجة.

2-في حركة عند الكوريات اسمها التنظيف المضاعف الي هي أول شي تستخدمي غسول كريمي للانه بيزيل أي مكياج عالق بعد ماتحطية تسوي مساج للبشرة بايدك أو بآلة مثل آلة  نيتروجينا أو تقدري تستخدمي فرشة تسوي مساج +تقشير يومي زي كلاريسونيك بعد كذا تستخدمي أي غسول يسوي رغوة وتغسلي فيه وجهك.



 ( سكراب )

يلي تستخدم جهاز كلاريسونيك أو أي جهاز ثاني تسوي سكراب مره وحدة في الاسبوع لو حسيتي انك تحتاجية.

أما الي ماتستخدم فرش تسوي سكراب 3 مرات في الأسبوع.

السكراب مهم عشان نتخلص من الجلد الميت ونحصل على طبقة جديدة من البشرة لان الجلد الميت يسد المسام وهذا يلي يسبب الحبوب و الرؤوس السوداء ومشاكل البشرة. اختاري النوع الي يعالج مشاكل بشرتك ويناسبها وركزي على المناطق الي تحتاج عناية خاصة منطقة التي زون و حوالين الأنف. 

( ماسك للبشره )

الماسك مهم للبشرة عشان التغذية أو علاج مشاكل ولازم يكون على بشرة نظيفة لتحصلي على أقصى استفادة.

 الماسك أقل شيء تحطينه 3 مرات في الأسبوع في أنواع وايد لكل نوع فوائده وبعد بأشكال وايد مثل الجل والكريمي والورقي(هذا بيستخدموة الكوريين وايد ويجي بانواع مختلفة موجودة في ذا فيس شوب) وغيرها.

 شوفي شو تحتاج بشرتك وبعد شو نوعها واختاري ولا تنسي ان الماسكات الطبيعية مفيدة اكثر.

(تقشير الشفايف ) 

تقشير الشفايف مايقل أهمية عن تقشير البشرة للانه يخلي الشفايف شكلها أجمل لمن نحط الروج + تستفيد شفايفك من المرطب.

السكراب تسوينه كل ماتحسي شفايفك تحتاج له

وفي أنواع وايد و تقدري تسوينه في البيت مثلا تخلطين زيت جوز هند + عسل + سكر بني أو حتى فازلين + سكر بني في إضافات وايد تقدري تستخدميها ويصير عندك سكراب طبيعي.

وفي عندك السكراب الجاهز مثل يلي في فيش شوب و لاش ويلي من إيلف . 

 ( التونر ) 

التونر مهم عشان يهدئ البشرة ويكون قابض للمسام بعد عملية التنظيف ويعيد توازن ال PH لبشرتك + يحضر البشرة للترطيب طريقة استخدام التونر تحطية في قطنة وتمسحية على البشرة أو حطية في بخاخ ورشي.

 وفي خيارات متنوعة للتونر أهم شي ابعدي عن النوع الي بيحتوي على كحول لانه يخرب توازن البشرة إلا في حالة انه بشرتك تعاني من حبوب في هذي الحالة تقدري تستخدمية على المناطق المصابة ب الحبوب.

( السيروم )

في ناس مايهتمو ب موضوع السيروم ويحسبون انه مثله مثل المرطب أو بس للناس الكبيرة.

لازم نعرف ان المرطب وظيفته الأساسية الترطيب اما السيروم بيكون لعلاج المشاكل.

مثل الي يكون مضاد للشيخوخة أو لتنقية البشرة أو لتوحيد البشرة أو التفتيح. تركيبته تكون سائلة اكثر من الكريم عشان جزيئاته اصغر وبتوصل ل طبقات البشرة الداخلية وبشكل أعمق عشان كذا بيعالج البشرة. تحتاجي كمية بسيطة جدا منه لا تاخدي كثير وتوزعية على البشرة.

 ( كريم العين + الترطيب الكامل للوجه) 

كريم العين تحطية بشكل طبطبة ومساج خفيفة في المنطقة بعد كذا تحطي الكريم المرطب المناسب لبشرتك وتسوي مساج  ولا تنسي ترطيب الرقبة بعد وترطيب الشفايف. 

وكذا خلصنا روتين العناية ب البشرة عشان تكون بشرتك جميلة ومستعدة للمكياج في اليوم الثاني أهم شيء العناية المستمرة ب البشرة عشان تظل مرطبة ونضرة ومحافظة على شبابها و تتجنبي المشاكل قبل ماتصير دائما اختاري المنتجات المناسبة لعمرك. ❤️

تجربتي مع منتجات فيم فرش _Fem Fresh ❤️

السلام عليكم ورحمة الله وبركاته،،،

في البداية الكل يعرف أهمية الإهتمام بالمنطقة الحساسة ونظافتها, وبنفس الوقت فيه كثير مهـملين هالنقطة!

بعضهم بنآت و بعضهم متزوجات..

راح اتكلم عن عدة مواضيع في العناية بالمنطقة الحساسه ومعها تجربتي لمنتجات فيم فرش.

 العنـاية الشخصية للمنطقة تحتاج إلى  ..(فوط يومية, مناديل, غسول , سبري , باودر) 

طبعا كلنا عارفين ان المنطقه مكتمه ماتتعرض للهواء .. لذلك تلاحظينها لونها غير عن باقي جسمك..

عشـآن كذا يفضّل تتبعي النظام التالي .. عشان تحصلين ع منطقة ناعمه ونظيفه ولونها حلـو..

1/اهم نقطة وهي الغسولات..(للتـخلص من الريحه الكريهه بالمنطقه) في نقااط مرا مهمه احب اذكركم فيها عند إستخدام هذي الغـسولاات ومن أجمل الغسولات يلي جربتها هو غسول فيم فرش للامانه نظااااافه وريحة هادية وحلوه ...

A/ يتم تنظيفها من منطقه العانه الى الخلــف وذلك لمنع نقل البكتيريا وانتشــارها بالمنـطقه الحساسة>> دوم احرصوا ع تنظيف المنطقة من الأمام إلى الخلف..مررا مهمه يابنات هالمنطقة..

B/ حــطي ببالك إستخدام الغسول يكون فقـط مرا وحده باليوم .. وثلاث مرات بالاســبوع..

لان كثرتـها تضرك.. تقتل البكتيريا النافعه بالمنطقه..

لذلك كوني حريصه ع عدم الاكثار ..منها

وبين فترة وفتره استخدمي..

ملح خشن  مع موية دافيه وغسلي المنطقه

تحسين بإنتعااش فضييع..بشكل عام الملح الخشن جداً ممتاز

C/ عدم استخدام الشامبو او الصابون العادي لانه يسبب جفاف + تسلخات و إلتهابــآت

D/ اذا جتك إلتهابات او روائح بشكل مستمر عالجي نفسك اول بأول ولاتهملين المنطقه ابداً..

دوم إحرصي ع إستخدام غسولات صحية وإبعدي كل البعد عن التجارية منها..

 

2/السبري يلي يحافظ على نظافة المنطقه وريحتها استخدمه دايما بعد الشاور اكون غسلت بالغسول اجفف المنطقه وارش عليها من السبري وأثبت الريحه بالباودر من نفس المجموعه يعطي احساس بالنظافه ...

3/إهتمي بإستخدام الفوط الصحية اليوميـة.. وانا عني افضل كيرفري _(care free)..

مرا ناعمه وحلوة كإستخدام يومي.. بكذا .. تحصلين ع منطقة نظيفه حتى الكلوت مايتوسخ عليك ..وكل مرا تغيرينها.. 

بكذا تحافظين ع نظافة المكان ومايكون فيه بكتيريا.. متجمعه او كل شوي تغيرين الكلوت..

4/اهتـمي دايماً تمسحين المنطقة بالمنديل بعد إنتهائك.. و انصحك كمآن بعدها مسحي المنطقه بالمناديل المخصصة بالمنطقه من فيم فرش او حتى مناديل الـ Baby من سيباميد  .. مرا تجنن وتعطي ريحة طفوليه نظيفه وماتسبب لك اي حساسيه او اي إلتهابات .. ولا فيها مواد عطره..أو اي نوع ثاني انتي تفضلينه يكون مخصص لهالمنطقة ويكون طبي لا يحتوي على مواد عطريه انا عني بعد تجربه صرت افضل فيم فرش تعطي احساس بالنظافه ويعطي المنطقة رطوبه و انتعاش حلو وريحة مرا حلوة ... وتقديرى دايما تحطين معك في الشنطه منديل او ٢ للمشاوير الطويلة علشان تحافظي على نظافة المنطقه.....

الامانه يا بنات احلى مجموعه استخدمتها فيم فرش روووعه وريحتها حلوه وتجي مجموعة مكملة لبعضها البعض ولاحظت انه الإفرازات قلة لما استخدمتها ❤️❤️

اتمنى الاستفادة 

إنستغرام : zezi_beauty_blog

طريقتي في عمل الحمام المغربي في البيت ❤️

السلام عليكم ورحمة الله وبركاته،،، 

في هذا البوست حبيت أتكلم عن طريقتي في عمل الحمام المغربي في البيت، راح يكون على خطوات احسن وأسهل 

أولا:  الأدوات يلي استخدمها 

جهاز سونا ، صابون حمام مغربي ، ليمون ، سنفره ،ليفه مغربية ، ( الطين المغربي ،خلطة حناء الجسم >>أختباري أو مره وحده فالشهر ) 

ثانياً: تجهيز الحمام اشغل جهاز السونا واخليه نص ساعه لحد ما يصير الحمام كله بخار طبعا أغطي فتحت المروحة بفوطه مبلوله علشان تحبس البخار في الحمام وفي وقت الانتظار ازيت شعري باي زيت عندي او احط عليه كريم كاب. 

ثالثاً: ادخل في الحمام واجلس لمدة ١٠ دقايق او ربع ساعه

وابداء أوزع اليمون على جسمي وأخلية لمدة ٣ دقايق بعدها احط الحمام المغربي واجلس فيه لمدة ١٠ دقايق وأغسلة بماء دافئ 

رابعاً: اجهز الليفه المغربيه وأحطها في ماء دافىء وأبدا أفرك فيها جسمي من تحت لفوق والعكس علشان أتخلص من الجلد الميت ومنها تنشيط للدورة الدموية في الجسم . 

خامساً: اغسل جسمي باي صابونيه اكون معتمدتها لتبييض وبعدها أقشر جسمي بالسكراب واحط بعده اي ماسك آكون مجهزته سواء كان ماسك الحناء او ماسك عادي وبعدها ب١٠ دقايق اغسل جسمي وشعري. 

إحيانا قبل لا اطلع أقفل الجهاز واحط ماسك الطين على وجهي واحط كريم كاب على شعري وانتظر شوي وبعدها اغسل شعري ووجهي ❤️❤️

اتمنى الاستفادة من البوست 

حساب إنستغرام : Zezi_Beauty

تجربتي مع جهاز فيليبس لوميا (Philips Lumea)❤️

السلام عليكم ورحمة الله وبركاته ،،، 

 في هذا البوست حابه أتكلم عن تجربتي مع جهاز الوميض الضوئي المكثف من فيليبس. 

Philips Lumea (IPL)

طبعا ما في بنت ما تحب تتخلص من الشعر الزائد في جسمها 😓 وانا من زمان كان خاطري اسوي ليزر في العيادات وقمت اتصلت على كذا عياده تجميلية في العين وسألت عن أسعارهم مثل عيادة المدار وأنفينتي وكوزمسرج وبصراحه لما عرفت أسعارهم شفتها وايد غاليه يعني توصل سعر الجلسه لكامل الجسم بحدود ٢٧٠٠ أو ٣٠٠٠ درهم جلسة وحده في الشهر 😏. 

المهم ما راح أطول بعد مناقشات وتفكير بخصوص انه يكون متوفر جهاز ليزر بدل العيادات وايد أحسن منها توفير للمبالغ يلي راح تطلع على شي مب ضامنين شغله ( أقصد العيادات) ومنها تجربه، قررنا ناخذ طبعا بعد مدح الناس له من خلال المواقع جهاز فيليبس لوميا بسعر جلسة وحده وهو ٣٥٠٠ درهم ويكفي لسنين قدام 😎. من مميزات هالجهاز انه صحي يعمل على الوميض الضوئي المكثف ومب ليزر.

ويحتوي على رأسين الصغير مع واقي زجاجي لونه برتقالي للأماكن الحساسه والوجه ورأس كبير مفرغ لا يحتوي على واقي للأجزاء الباقيه من الجسم مثل اليدين والقدمين وغيرها.  

من خلال تجربتي لهذا الجهاز ولمدة سنه كااااامله اشوفه وايد حلو ويستاهل المدح الموجود عليه للاسباب منها انه وايد خفيف على البشر ويناسب البشرة الحساسه يعني يسبب وغزه بسيطه جدا شي لا يذكر مع اني قريت كذا بنت تستخدم مخدر موضعي بخاخ علشان تزيد الدرجه وأنا استخدم رقم ٥ أعلى درجه بدون اي تخدير وعادي ما سبب لي أي شي مع أنه بشرتي من النوع الحساس فعلا اشوفه ما يحتاج للتخدير للانها وغزه خفيفه واستخدم رقم ٣ للبكيني ورقم ٤ للويه والباط. 

 وبعد من الأسباب إنه عطاني مفعول جدا سريع يعني من خلال جلستين والشعر بدء يخف شوي وبعد ما كملت الخمسة أو سته شهور تقريبا كنت الاحظ انه بدء يطلع شعر اسود غليظ بس اول ما أمسكه بإيدي او اسحبه نتسحب الشعره من داخل بدون لا تعورني أو حتى أحس فيها وبعدها خلاص المكان ما تطلع فيه شعره يعني اتوقع انها ماتت >>>> سخيفه صح 😅) هذا الشي لاحظته في ريولي ويديني وبالنسبة للأماكن الحساسه البكيني صار أماكن يطلع وأماكن لا والباط الحمدلله تخلصت منه يطلع شعر وايد خفيف وكم شعره بس تنعد بالأصابع، ومن مميزاته بعد إني أرتحت من الشعر يلي يطلع تحت الجلد والاحمرار والحكه وبعد ارتحت من المسامات صارت ريولي صافيه فيها شعر بسيط وان شاء الله مع الاستمرار بيروح ويديني بعد الشعر فيها صار وايد خفيف والحمدلله افتكيت من عقد الشعر والحلاوة. 

 

أنصح تستخدمي مع هالجهاز او الليزر بشكل عام أمواس الحلاقه ( الشفرات ) فينوس وايد حلوه وما تسبب حساسيه للجسم. 

الحين أنجي نتكلم عن عيوب هالجهاز هو فيه عيبين من وجهة نظري انا أول شي تعبئته بسرعه تخلص، وثاني شي هو عباره عن ١٠٠٠٠٠ ومضة ( مائة الف ومضه) وبعدها تنتهي صلاحية الجهاز وقريت انه هالعدد من الومضات تكفي ٥ سنين إستخدام شخصي ( والله أعلم ) 

أتمنى أنكم تستفيدو من هالبوست ❤️

إنستغرام: zezi_beauty

مشترياتي وتجربتي مع منتجات ذا فيس شوب ❤️

السلام عليكم ورحمة الله وبركاته،،، 

فالبداية حابه أتكلم عن شركة ذا فيس شوب TheFaceShop هي شركه كوريه متخصص في مجال مستحضرات التجميل شركه منتجاتها حلوه بمعنى الكلمة وأسعارها وايد حلوه ومناسبه مقارنه بماركات شركات مستحضرات التجميل الثانيه 

هذي مشترياتي منها هي عباره عن ماسكات وأقنعه وجل للوجه وسيروم ومقشر شفايف وسي سي كريم 

 سي سي كريم وايد حلو وتحسي 

بنعومة لما تحطيه على ويهج يعطي تغطيه مخملية وايد حلوه وطبيعية للويه بدون لا يخطط أو يوضح المسامات بس لازم تكون البشره نظيفه طبعا ومرطبه وانصح بمجموعه فيس شوب عباره عن تونر وجل وسيروم للويه 

 هذا جل بعد ما أتنظفي ويهج تاخذي من شوي وتوزعينه على ويهج يرطب البشره 

هذا سيروم  تحطينه على ويهج بعد ما ينشف الجل تاخذي منه كميه بسيطه وتوزيعيها على ويهج وبعد ما ينشف تحطي السي سي كريم يعطيج نتيجه روووعه 

هذا مقشر شفايف بنكهة المانجا ريحته تجنن وفيه حبيبات صغيره أتوقع سكر بني بس جد وايد حلو 

هذا قناع وماسك باودر وايد حبيتهم يعطون حيويه للويه 

هذي بعض المنتجات يلي أشتريتها أخذت بعد أقنعة فيتامينات للويه مثل A , B وأخذت مقشر القدم يلي طريقه استخدامه مبينه بالصور وبعد ٥ أيام بالضبط بينت عندي النتيجه وريولي تقشرة وشالت الجلد الميت بس يبيلي أستمر فترة علشان أحصل على نتيجه أحلى 

هذي كانت تجربتي مع هالماركه الكوريه بصراحه رووووعه وكل منتجاتها أحلى من الثانيه أنصح فيها 

تجربتي لبعض منتجات ماك ❤️

السلام عليكم ورحمة الله وبركاته ،، 

حابه أتكلم عن ثلاث منتجات صارلي فتره أستخدمهم من ماك يلي هي كونسيلر وبي بي كريم و إستوديو باودر فيكس. 

أولاً البي بي كريم : 

تغطيته خفيفه مثله مثل أي بي بي كريم في نسبه من واقي الشمس قوامه كريمي بسهوله تقدرين تدمجينه حبيته وايد للاستخدام اليومي للان بشرتي مختلطة والحمدلله صافيه ف وايد ناسبني وحسيت تغطيته حلوه. 

ثانياً الكونسيلر : 

تغطيته خفيفه بس حلوه للإستخدام اليومي يحتوي على معادن وفيتامينات مفيده للبشره حبيته مع البي بي كريم.  

ثالثاً إستوديو باودر فيكس:  

تغطيتها وايد حلوه هي عباره عن بودر وفاونديشن تخلي الفيس مات بس جد حبيت هالمنتجات لما أستخدمهم مع بعض يطلع الفيس وايد حلو وصافي وقريت إنه يستخدم بإسفنجة مبلوله أو جافه بس أنا أستخدمها جافه وتعطيني تغطيه وايد حلوه مع البي بي كريم. 

مشترياتي من الذهب

السلام عليكم ورحمة الله وبركاته ،،، 

طبعاً بما أنه سعر الذهب هالفترة نزل ووصل سعر الجرام ١١٢ قررت أشتري الان خاطري في ذهب من النوع التراثي بما أنه هالأيام كل العالم ردت تشتري الذهب وبالذات الذهب التراثي ف راح أعرض صور الذهب يلي أخذته وسعره وأسمه التراثي 

هذي الأسوارة أسمها التراثي في الإمارات وسلطنة عُمان ( الملفت) فما أدري إذا باقي دول الخليج يسمونها نفس الاسم أو لا أخذتها ب ٢٤٠٠ درهم 

هذا خاتم شبيه بالحجل التراثي ( البنجري) أو ( المشوك ) أخذته ب ٦٥٠ درهم 

طبعا معظم الحريم يعرفون لطريقة حساب الذهب بس في حريم للحين ما تعرف فهو يكون على ثلاث أسس يلي هي : 

١- معرفة سعر جرام الذهب عن طريق النت وفي تطبيقات وايد للايفون تحدث سعر الذهب بشكل يومي منها تطبيق أسعار العملات يحدد سعر الذهب والفضه والعملات هالتطبيق أنا معتمده وجدا دقيق وحلو. 

٢- معرفه قيمة سعر المصنع وهي قيمه يحددها البائع لكن في منهم نصابين ياخذو القيمه بالمئات وهي في الواقع لا تتجاوز ٣٠ أو ٢٠ درهم. 

٣- معرفة وزن القطعه ولازم تكوني منتبهه لما يوزن القطعه للان أحيانا يزيد البائع في الوزن. 

الحين الطريقة الحسابية : 

مثلاً: 

سعر الجرام ١١٢ ، وقيمة المصنع بعد ما حددها البائع ١٥ درهم ، ووزن القطعه ١٩.٥ جرام 

في هالحاله : 

١١٢ + ١٥ = ١٢٧ درهم 

١٢٧ * ١٩.٥ = ٢٤٧٦.٥ درهم 

وطبعا اذا كنتي شاطره تقدري تنزلي ٧٦.٥ درهم وتأخذيها ب ٢٤٠٠ درهم ❤️

أتمنى الإستفاده،،،

أفضل عطورات أستخدمتها و حبيتها

السلام عليكم ورحمة الله وبركاته ،،، 

هذي بداياتي فحبيت اتكلم فيها عن مكونات العطورات يلي استخدمتها وحبيتها ❤️

جوسي كوتير فيفا لا جوسي (viva la juicy ) 

المكونات العليا هي الشمام والمائي والمندرين وثمرة الآلام القرنفلية والاوراق الخضراء والاذريون 

المكونات المتوسطه هي مسك الروم والزنبق والورد البري 

المكونات الأساسيه هي الفانيليا البودريه ومحروق الكريم والبتشول والأخشاب .

Versace Medusa

المكونات العليا هي ندى الصباح الطازج وعصير الجوافه و الزنابق البيضاء 

المكونات المتوسطه هي الزهور مثل الياسمين واللوتس 

المكونات الأساسيه هي نارجيل الهند وخشب الأرز والمسك. 

Versace Vanitas  

يتكون من الليمون والفريزيا والتونكا وخشب الأرز.  

كارولينا هيريرا ( VIP 212) 

المكونات العليا هي مزيج من باشن فروت والرم الغني 

المكونات المتوسطة هي المسك والغردينيا العميقة الناعمة 

المكونات الأساسيه حبوب التونكا والفانيليا الحلو والمر. 

Juice couture (dirty English)

المكونات العليا هي اليوسفي لاذعا والسرو الأزرق والبرغموت كالابريا والكمون والهيل.  

المكونات المتوسطه هي البردقوش وخشب الصندل والأرز وأطلس الجذر ونارجيل الهند.  

المكونات الأساسيه العود وخشب الأبنوس والطحلب الأسود والعنبر والمسك. 

Hugo Boss (Boss Nuit Pour Femme Intense)

المكونات العليا هي الخوخ الأبيض.  

المكونات المتوسطه هي الياسمين والبنفسج والزهور البيضاء.  

المكونات الأساسيه هي الطحلب وخشب الصندل. 

Christian Dior Pure Poison 

المكونات العليا هي البرتقال ، اليوسفي ، البرغموت والياسمين. 

المكونات المتوسطه هي البرتقال والزهر والغردينيا. 

المكونات الاساسية هي خشب الصندل والأرز والعنبر الأبيض.  

Roberto Cavalli 

المكونات العليا هي البرتقال اليوسفي وأزهار الزعفران.  

المكونات المتوسطه هي روائح من الجلود وأزهار شجر البرتقال.  

المكونات الأساسيه الفانيليا والبخور المعطر والعنبر والعود. 

أتمنى الإستفاده ..

حساب الانستغرام @zezi_beauty